Námsleiðir

Námsleiðum í framhaldsskóla er skipt í nokkra meginflokka eftir skyldleika náms og/eða starfsgreinum:

• Almennt nám – opin öllum nemendum sem ekki hafa gert upp hug sinn varðandi áframhaldandi nám í framhaldsskóla og nemendum sem lokið hafa grunnskólaprófi en uppfylla ekki skilyrði til inngöngu á lengri námsbrautir.


• Stúdentsnám. Brautirnar eru: alþjóðleg námsbraut, félagsfræðabraut, málabraut, náttúrufræðibraut og viðskipta- og hagfræðibraut. Einnig er mögulegt að ljúka stúdentsprófi með viðbótarnámi af öðrum brautum t.d. starfsnámsbrautum og listnámsbrautum.


• Listnám.  Námið tekur þrjú ár og býr nemendur undir áframhaldandi nám og störf á sviði lista. Brautirnar eru: hönnun, listdans, margmiðlunarhönnun, myndlist og tónlist.


• Starfsbrautir (nám fyrir fatlaða) eru ætlaðar nemendum sem hafa notið verulegrar sérkennslu í grunnskóla og ekki hafa forsendur til þess að stunda nám á öðrum námsbrautum.


• Starfsnám. Þetta er lang stærsti flokkur námsbrauta í framhaldsskólum. Nám á starfsnámsbraut veitir undirbúning til tiltekinna starfa og/eða áframhaldandi náms. Margar starfsnámsbrautir leiða til ákveðinna starfsréttinda.

Nánari upplýsingar er að finna á vef menntamálaráðuneytisins, www.menntamalaraduneyti.is

Í öllum framhaldsskólum landsins er nú unnið að nýjum skólanámskrám. Skólarnir hafa í samræmi við ný lög heimildir skv. þeim til þess að búa til eigin námsbrautir sem menntamálaráðuneytið þarf að staðfesta. Fái einhver skóli heimild til þess að bjóða upp á nýja námsbraut í tilraunaskyni komandi haust verður það auglýst sérstaklega.